Dil-e-naadaan Tujhe Huaa Kyaa Hai

Dil-e-naadaan Tujhe Huaa Kyaa Hai
Aakhir Is Dard Ki Davaa Kyaa Hai

Ham Hain Mushtaaq Aur Vo Bezaar
Yaa Ilaahi Ye Maajaraa Kyaa Hai

Main Bhi Muunh Men Zabaan Rakhataa Huun
Kaash Puuchho Ki Muddaa Kyaa Hai

Jab Ki Tujh Bin Nahin Koi Maujuud
Phir Ye Hangaamaa, Ai Khudaa Kyaa Hai

Ye Pari Cheharaa Log Kaise Hain
Gamazaa-o-ishvaa-o-adaa Kyaa Hai

Shikan-e-zulf-e-ambari Kyon Hai
Nigah-e-chashm-e-surmaa Saa Kyaa Hai

Sabazaa-o-gul Kahaan Se Aaye Hain
Abr Kyaa Chiz Hai Havaa Kyaa Hai

Hamako Unase Vafaa Ki Hai Ummid
Jo Nahin Jaanate Vafaa Kyaa Hai

Haan Bhalaa Kar Teraa Bhalaa Hogaa
Aur Darvesh Ki Sadaa Kyaa Hai

Jaan Tum Par Nisaar Karataa Huun
Main Nahin Jaanataa Duaa Kyaa Hai

Main Ne Maanaa Ki Kuchh Nahin 'ghalib'
Muft Haath Aaye To Buraa Kyaa Hai