Sar Gashtagi Men Aalam-e-hasti Se Yaas Hai

Sar Gashtagi Men Aalam-e-hasti Se Yaas Hai
Taskin Ko De Naved Ke Marane Ki Aas Hai

Letaa Nahin Mere Dil-e-aavaaraa Ki Khabar
Ab Tak Vo Jaanataa Hai Ke Mere Hi Paas Hai

Kije Bayaan Suruur-e-tap-e-gam Kahaan Talak
Har Muu Mere Badan Pe Zabaan-e-sipaas Hai

Hai Vo Guruur-e-husn Se Begaanaa-e-vafaa
Har-chand Us Ke Paas Dil-e-haq-shanaas Hai

Pi Jis Qadar Mile Shab-e-mahataab Men Sharaab
Is Balagami Mizaaj Ko Garmi Hi Raas Hai

Har Yak Makaan Ko Hai Makin Se Sharaf "asad"
Majanuun Jo Mar Gayaa Hai To Jangal Udaas Hai