Sab Kahaan Kuchh Laalaa-o-gul Men Numaayaan Ho Gain

Sab Kahaan Kuchh Laalaa-o-gul Men Numaayaan Ho Gain
Khaak Men Kyaa Suuraten Hongi Ki Pinhaan Ho Gain

Yaad Thi Hamako Bhi Rangaa Rang Bazmaaraaiyaan
Lekin Ab Naqsh-o-nigaar-e-taaq-e-nisiyaan Ho Gain

Thin Banaatunnaash-e-garduun Din Ko Parde Men Nihaan
Shab Ko Unake Ji Men Kyaa Aai Ki Uriyaan Ho Gain

Qaid Men Yaaquub Ne Li Go Na Yuusuf Ki Khabar
Lekin Aankhen Rauzan-e-divaar-e-zindaan Ho Gain

Sab Raqibon Se Hon Naakhush, Par Zanaan-e-misr Se
Hai Zulaikhaa Khush Ke Mahv-e-maah-e-kanaan Ho Gain

Juu-e-khuun Aankhon Se Bahane Do Ki Hai Shaam-e-firaaq
Main Ye Samajhuungaa Ke Shamaen Ho Farozaan Ho Gain

In Parizaadon Se Lenge Khuld Men Ham Intaqaam
Qudarat-e-haq Se Yahi Huuren Agar Waan Ho Gain

Nind Usaki Hai, Dimaag Usakaa Hai, Raaten Usaki Hain
Teri Zulfen Jisake Baazuu Par Parishaan Ho Gain

Main Chaman Men Kyaa Gayaa, Goyaa Dabistaan Khul Gayaa
Bul-bulen Sun Kar Mere Naale, Gazal_khvaan Ho Gain

Vo Nigaahen Kyuun Hui Jaati Hain Yaarab Dil Ke Paar
Jo Meri Kotaahi-e-qismat Se Mizshgaan Ho Gain

Bas Ki Rokaa Main Ne Aur Sine Men Ubharen Pai Ba Pai
Meri Aahen Bakhiyaa-e-chaak-e-garibaan Ho Gain

Waan Gayaa Bhi Main To Unaki Gaaliyon Kaa Kyaa Javaab
Yaad Thi Jitani Duaayen, Sarf-e-darbaan Ho Gain

Jaanfizaa Hai Baadaa, Jisake Haath Men Jaam Aa Gayaa
Sab Lakiren Haath Ki Goyaa Rag-e-jaan Ho Gain

Ham Muvahihad Hain, Hamaaraa Kesh Hai Tark-e-ruusuum
Millaten Jab Mit Gain, Ajzaa-e-imaan Ho Gain

Ranj Se Khuugar Huaa Insaan To Mit Jaataa Hai Ranj
Mushkilen Mujh Par Pa.di Itani Ke Aasaan Ho Gain

Yuun Hi Gar Rotaa Rahaa 'ghalib', To Ae Ahl-e-jahaan
Dekhanaa In Bastiyon Ko Tum Ki Viraan Ho Gain