Ghar Jab Banaa Liyaa Hai Tere Dar Par Kahe Bagair

Ghar Jab Banaa Liyaa Hai Tere Dar Par Kahe Bagair
Jaanegaa Ab Bhi Tuu Na Meraa Ghar Kahe Bagair

Kahate Hain, Jab Rahi Na Mujhe Taaqat-e-sukhan
Jaanuun Kisi Ke Dil Ki Main Kyuunkar Kahe Bagair

Kaam Us Se Aa Pa.daa Hai Ki Jisakaa Jahaan Men
Leve Naa Koi Naam Sitamagar Kahe Bagair

Ji Men Hi Kuchh Nahin Hai Hamaare Vagarnaa Ham
Sar Jaaye Yaa Rahe Na Rahen Par Kahe Bagair

Chho.duungaa Main Na Us But-e-kaafir Kaa Puujanaa
Chho.de Na Khalq Go Mujhe Kaafir Kahe Bagair

Maqsad Hai Naaz-o-gamzaa Vale Guftaguu Men Kaam
Chalataa Nahin Hai, Dashnaa-o-khanjar Kahe Bagair

Har Chand Ho Mushaahidaa-e-haq Ki Guftaguu
Banati Nahin Hai Baadaa-o-saagar Kahe Bagair

Baharaa Huun Main To Chaahiye Duunaa Ho Iltafaat
Sunataa Nahin Huun Baat Muqarrar Kahe Bagair

"ghalib" Na Kar Huzuur Men Tuu Baar-baar Arz
Zaahir Hai Teraa Haal Sab Un Par Kahe Bagair