Gair Len Mahafil Men Bose Jaam Ke

Gair Len Mahafil Men Bose Jaam Ke
Ham Rahen Yuun Tashnaalab Paigaam Ke

Khastagi Ka Tum Se Kyaa Shikavaa Ke Ye
Hathakande Hain Charkh-e-nili Faam Ke

Khat Likhenge Garche Matalab Kuchh Na Ho
Ham To Aashiq Hain Tumhaare Naam Ke

Raat Pi Zam-zam Pe May Aur Sub_h-dam
Dho_e Dhabbe Jaamaa-e-eharaam Ke

Dil Ko Aankhon Ne Phansaayaa Kyaa Magar
Ye Bhi Halqe Hain Tumhaare Daam Ke

Shaah Ke Hai Gusl-e-sehat Ki Khabar
Dekhiye Din Kab Phiren Hammaam Ke

Ishq Ne 'ghalib' Nikammaa Kar Diyaa
Varnaa Ham Bhi Aadami The Kaam Ke