Daayam Paidaa Huaa Tere Dar Par Nahin Huun Main

Daayam Paidaa Huaa Tere Dar Par Nahin Huun Main
Khaak Aisi Zindagi Pe Ke Paththar Nahin Huun Main

Kyuun Gardish-e-mudaam Se Ghabaraa Na Jaaye Dil
Insaan Huun, Pyaalaa-o-saagar Nahin Huun Main

Yaarab! Zamaanaa Mujh Ko Mitaataa Hai Kis Liye
Lauh-e-jahaan Pe Harf-e-mukarrar Nahin Huun Main

Had Chaahiye Sazaa Men Uquubat Ke Waaste
Aakhir Gunaahagaar Huun, Kaafir Nahin Huun Main

Kis Waaste Aziz Nahin Jaanate Mujhe
Laal-o-zumaruud-o-zar-o-gauhar Nahin Huun Main

Rakhate Ho Tum Qadam Meri Aankhon Se Kyuun Dareg
Rutabe Men Mahr-o-maah Se Kamatar Nahin Huun Main

Karate Ho Mujhako Manaa-e-qadam_bos Kis Liye
Kyaa Aasmaan Ke Bhi Baraabar Nahin Huun Main

'ghalib' Wazifaa_khwaar Ho, Do Shaah Ko Duaa
Wo Din Gaye Ki Kahate The "naukar Nahin Huun Main"