Ye Na Thi Hamaari Qismat Ke Visaal-e-yaar Hotaa

Ye Na Thi Hamaari Qismat Ke Visaal-e-yaar Hotaa
Agar Aur Jite Rahate Yahi Intazaar Hotaa

Tere Vaade Par Jiye Ham To Ye Jaan Jhuuth Jaanaa
Ke Khushi Se Mar Na Jaate Agar Aitabaar Hotaa

Teri Naazuki Se Jaanaa Ki Bandhaa Thaa Ahd_bodaa
Kabhi Tuu Na To.d Sakataa Agar Ustavaar Hotaa

Koi Mere Dil Se Puuchhe Tere Tir-e-nimakash Ko
Ye Khalish Kahaan Se Hoti Jo Jigar Ke Paar Hotaa

Ye Kahaan Ki Dosti Hai Ke Bane Hain Dost Naaseh
Koi Chaaraasaaz Hotaa, Koi Gam_gusaar Hotaa

Rag-e-sang Se Tapakataa Wo Lahuu Ki Phir Na Thamataa
Jise Gam Samajh Rahe Ho Ye Agar Sharaar Hotaa

Gam Agarche Jaan_gusil Hai, Pe Kahaan Bachen Ke Dil Hai
Gam-e-ishq Gar Na Hotaa, Gam-e-rozagaar Hotaa

Kahuun Kis Se Main Ke Kyaa Hai, Shab-e-gam Buri Balaa Hai
Mujhe Kyaa Buraa Thaa Maranaa Agar Ek Baar Hotaa

Hue Mar Ke Ham Jo Rusavaa, Hue Kyon Na Garq-e-dariyaa
Na Kabhi Janaazaa Uthataa, Na Kahin Mazaar Hotaa

Use Kaun Dekh Sakataa Ki Yaganaa Hai Wo Yaktaa
Jo Dui Ki Buu Bhi Hoti To Kahin Do Chaar Hotaa

Ye Masaail-e-tasavvuf, Ye Teraa Bayaan 'ghalib'
Tujhe Ham Wali Samajhate, Jo Na Baadaa_khvaar Hotaa