Har Ek Baat Pe Kahate Ho Tum Ki Tuu Kyaa Hai

Har Ek Baat Pe Kahate Ho Tum Ki Tuu Kyaa Hai
Tumhin Kaho Ke Ye Andaaz-e-guftaguu Kyaa Hai

Na Shole Men Ye Karishmaa Na Barq Men Ye Adaa
Koi Bataao Ki Vo Shokh-e-tundakhuu Kyaa Hai

Ye Rashk Hai Ki Vo Hotaa Hai Hamasukhan Hamase
Vagarnaa Khauf-e-badaamozi-e-ad Kyaa Hai

Chipak Rahaa Hai Badan Par Lahuu Se Pairaahan
Hamaari Jeb Ko An Haajat-e-rafuu Kyaa Hai

Jalaa Hia Jism Jahaan Dil Bhi Jal Gayaa Hogaa
Kuredate Ho Jo Ab Raakh Justajuu Kyaa Hai

Ragon Men Dau.date Phirane Ke Ham Nahin Qaayal
Jab Aankh Hi Se Na Tapakaa To Phir Lahuu Kyaa Hai

Vo Chiz Jisake Liye Hamako Ho Bahisht Aziz
Sivaa_e Baadaa-e-gulfaam-e-mushkabuu Kyaa Hai

Piyuun Sharaab Agar Khum Bhi Dekh Luun Do Chaar
Ye Shishaa-o-qadaah-o-kuuzaa-o-subuu Kyaa Hai

Rahi Na Taaqat-e-guftaar Aur Agar Ho Bhi
To Kis Ummid Pe Kahiye Ke Aarazuu Kyaa Hai

Banaa Hai Shaah Kaa Musaahib, Phire Hai Itaraataa
Vagarnaa Shahar Men "ghalib" Ki Aabaruu Kyaa Hai