Dost Gamkhvaari Men Meri Sai Farmaayenge Kyaa

Dost Gam_khvaari Men Meri Sai Farmaayenge Kyaa
Zakhm Ke Bharane Talak Naakhun Na Ba.dh Jaayenge Kyaa

Beniyaazi Had Se Guzari Bandaa Paravar Kab Talak
Ham Kahenge Haal-e-dil Aur Aap Farmaayenge Kyaa

Hazarat-e-naaseh Gar Aayen Didaa-o-dil Farsh-e-raah
Ko_i Mujh Ko Ye To Samajhaa Do Ki Samajhaayenge Kyaa

Aaj Vaan Teg-o-kafan Baandhe Hue Jaataa Huun Main
Uzr Meraa Qatl Karane Men Vo Ab Laayenge Kyaa

Gar Kiyaa Naaseh Ne Ham Ko Qaid Achchhaa Yon Sahi
Ye Junuun-e-ishq Ke Andaaz Chhut Jaayenge Kyaa

Khaanaa Zaad-e-zulf Hain Zanjir Se Bhaagenge Kyaa
Hain Giraftaar-e-vafaa Zindaan Se Ghabaraayenge Kyaa

Hai Ab Is Maamuure Men Qahat-e-gam-e-ulfat Asad
Ham Ne Ye Maanaa Ki Dilli Men Rahe Khaayenge Kyaa