Husn-e-maah Garche Baa_hangaam-e-kamaal Achchhaa Hai

Husn-e-maah Garche Baa_hangaam-e-kamaal Achchhaa Hai
Us Se Meraa Maah-e-khurshid-e-jamaal Achchhaa Hai

Bosaa Dete Nahin Aur Dil Pe Hai Har Lahajaa Nigaah
Ji Men Kahate Hain Muft Aaye To Maal Achchhaa Hai

Aur Baazaar Se Le Aayen Agar Tuut Gayaa
Saagar-e-jam Se Meraa Jaam-e-sifaal Achchaa Hai

Betalab Den To Mazaa Usamen Sivaa Mialtaa Hai
Vo Gadaa Jisako Na Ho Khuu-e-savaal Achchhaa Hai

Unake Dekhe Se Jo Aa Jaati Hai Muunh Par Raunaq
Vo Samajhate Hain Ki Bimaar Kaa Haal Achchhaa Hai

Dekhiye Paate Hain Ushshaaq Buton Se Kyaa Faiz
Ik Birahaman Ne Kahaa Hai Ki Ye Saal Achchhaa Hai

Ham_sukhan Teshe Ne Farahaad Ko Shirin Se Kiyaa
Jis Tarah Kaa Bhi Kisi Men Ho Kamaal Achchhaa Hai

Qataraa Dariyaa Men Jo Mil Jaaye To Dariyaa Ho Jaaye
Kaam Achchaa Hai Vo Jisakaa Ma'aal Achchhaa Hai

Khijr Sulataan Ko Rakhe Khaaliq-e-akbar Sar_sabz
Shaah Ke Baag Men Ye Taazaa Nihaal Achchha Hai

Hamako Maaluum Hai Jannat Ki Haqiqat Lekin
Dil Ke Khush Rakhane Ko Ghalib Ye Khayaal Achchha Hai